زاوية خضراء. بقلم :داؤد ابوكلام داؤد حزب الأمة والفتنة الكبري

طبعا كلنا عارفين الدنيا رمضان وهذا الشهر فيه روحانيات وليالي جميلة تتخللها العبادات والصلوات والتراويح وقيام الليالي وتلاوة القرآن والافطارات والضروات في الشوارع شهر المحبة والتسامح والأفراح وكمان فيه انزل القرآن وفيه ليله خير من ألف شهر.. في هذا الموسم.. موسم الايمانيات والروحانيات ما كنت داير اتكلم في السياسة السودانية ولا حتي بعض الأحزاب الوهمانه والجهلانه وفيها ناس عبيطين جنس عباطة. ولما كنت أجد نفسي في كثير من القروبات. لاحظت هناك شخص كثير المداخلات وكأنه من الخبراء الاستراتجيين في شئون جنوب كردفان وجبال النوبا. وده الخلاني اكتب هذة الزاوية. ونحن نستقبل والي جديد لجنوب كردفان وهو السيد/محمد إبراهيم أحمد عبد الكريم. شخصيا لا اعرفة وليس لي به سابق معرفه. ولم التقي معه حتي اللحظة. ومن طبعي لا أحب التقرب إلى الحكام الا (لمما). وهو جاء خلفا للوالي السابق /موسي جبر محمود وهو صديق تربطنا به صلات وصلات ونحن أهل وجيران في البلد وقد قام بدوره خير قيام له منا الشكر اجزله. والداير اقولوا حزب الأمة ده نحن نعرفه حق المعرفه. وبعرف كثير من قياداته المحترمة حتي داخل كادقلي وحتي على مستوى الخرطوم سكنت وسط قياداتهم وحضرة معظم ندواتهم يوم الأربعاء بدارهم بشارع الموردة كانت لهم ايام واندثرت.!!؟؟ وممكن تقول انا بحب الحبيبة مريم المنصورة بعيد بعيد بنسبة18٪. ما وصلنا خط ستة هههه لأنني اعرف جيراننا وهم صديقاتها بنات المرحوم. اسحق الخليفة شريف وناس مراحم ورحيمة وحاجة شامة وناس دكتورة/زينب عبدالرحمن ازرق واخوها صديقي الصادق (كتكوت) كان من رجالات التدريب العسكري الكديد بمدرسة وادي سيدنا لا أدري. أين هو الآن.؟؟ أما سعادة اللواء /فضل الله برمة ناصر. بحبوا بسنبة 3 ٪. طبعا يا جماعة المحبة من الله.. وشايفوا امبارح في افطارهم. قال. (الانقسام يهيمن علي القوي السياسية وقال حتي المكون العسكري يواجه انقسام). وقال السلاح منتشر في جميع أنحاء البلاد بدرجة اقوي من سلاح الأجهزة الرسمية (حقوا تخجل يا سعادة برمة). ما هو ده سلاحك ذاتوا الوزعتوا زماااااان لما كنت وزير دفاع حزب الأمة زمن حكومة المرحوم الصادق المهدي. (انت نسيت ولاشنو ولكن جبال النوبا لم تنسي). وانت عارف حساسية ناس جبال النوبا تجاه حزبكم. وهسي شايف عندك ناس هناء في جنوب كردفان اليومين ديل شانين هجوم شديد علي الوالي الجديد /محمد إبراهيم عبدالكريم. انا شخصيا كما ذكرت لا أعرفه ولم التقى به في حياتي. ولكن ومن واجبنا نحن حملة الأقلام. وتقع علينا مسئوليات تجاه المجتمع. ان ندافع عن الحق ونوضح الحقائق المجردة لوجه الله والوطن. ونعلم أن جنوب كردفان فيها ساسه وعلماء في كل المجالات. شايف بعض من ناس حزب الأمة وعلى رأسهم. ابننا (أيوب عبدالله أبكر) وهو لو لم تخني الذاكرة درس المرحلة الابتدائية في الجديدة (ب) بكادقلي .!!!!؟؟؟ وابوه عمنا مهندس /عبدالله أبكر معروف حزب أمة.. ورجل متواضع ومهذب واخوه ود ابوه احمد كبس (كهربجي كان بجي بشرب الشيشة طواالي مع خالي ادم عمران في حي الموظفين الشرقي بكادقلي.) واظنك كنت تعمل في مجال الحراسات الأمنية وكمان اخيرا عضو بالهيئة المجتمعية للخدمات والتنمية برئاسة سعادة اللواء (م) تاج الدين أحمد ادم. ونائبه الوزير /بلال الزاكي بلال. وانا بعرف ناس جدك /الأمير /الطاهر النور وخالك الأمير الحالي /النور الطاهر النور بابي كرشولا.

المهم في الأمر يا ابننا. / أيوب عبدالله أبكر. ليس لي اي علاقة بهذا الوالي الجديد. وشايفك قاعد تقول الوالي ده ما شرعي وهل هو معين ولا مكلف (الدنيا رمضان ناس القروبات ديل كلهم قاعدين يضحكوا فيك وتحت تحت قاعدين يقولوا الزول ده أكبر جهلول). داير اقول ليك الوالي /محمد إبراهيم عبدالكريم ده زول معين بقرار سيادي من مجلس السيادة ودي أعلى سلطة في الدولة قرارات مجلس السيادة قرارات دستورية وانت شكلك ما عارف طريقة اختيار الولاة دائما ما يتم ترشيح ثلاثه أشخاص . وبعد جرح وتعديل وقع الاختيار على هذا الوالي. وهو من خارج الولاية عشان ما بكره مافي واحد فينا يجي ويقول (كاني ماني). وهو أكد وقال حا يقيف على مسافة واحده من كل الناس و كل الأحزاب. و طبعا انطبقت عليه كل معايير المهنية والكفاءه والخبره وهو ضابط ادراي له خبرات في عدد من ولايات السودان. وجاي بصلاحيات واسعه بما فيها تطبيق. اتفاق سلام جوبا. وشايف في ناس قاعدة تقول الزول ده جاء وحده.!! خلي يمشي وحده ويموووت وحده ذاتو… دخلكم شنو.!!؟؟. برضوا حكاية. فلول دي. ما سعادة البرهان وسعادة حميدتي أكبر فلول. واللواء/عبدالرحمن الصادق أكبر فله؟؟ وكمان مريم المنصورة. ممكن تقول عليها أكبر بطيخة أو تسالي!!؟؟. انا رأي الوالي يشتغل شغلوا. والمثل قال (المافيهوا قول مازول) والحسد من طبع ابليس والبشر (قل أعوذ برب الفلق من شر ما خلق) ويا حزب الأمة اقرع ناسك وإياكم وجبال النوبا والفتنة الكبري.

المك/داؤد ابوكلام داؤد ١٩ رمضان ١٤٤٣.هجرية الموافق الاثنين الرابع من أبريل ٢٠٢٣.