اضرب واهرب ..عبدالمنعم شجرابي يكتب  عشان عيون أطفالنا

*** في ظل ( الحكم اللا مركزي ) عانت البلاد من ( المركزية ) حيث كانت الخرطوم قبلة لطالب العلاج والتعليم والعمل والاستثمار ( وملجأ )

للهاربين من تدني الخدمات بمناطقهم وحتى ولاة الولايات الأخرى ومسؤولوها ( فضلوا ) البقاء بها

المشهد بكل ( تفاصيله المملة ) انطلق ببورتسودان

( وانتبهوا أيها السادة )

*** انتصر المنتخب الوطني في التصفيات الأفريقية على نظيره الكنغولي ومن الملعب الأخضر انتقل نصره فرحة إلى البيوت والشوارع والأسواق والمزارع والمدارس وليته ليته يواصل الانتصارات

( عشان عيون أطفالنا ما تضوق الهزيمة )

*** عبد الرحيم دقلو مات في الأخبار مرة ومرة تانية ومرة تالتة مع أخبار أخرى ( تم نفيها ) وما هو ( غير قابل للنفي ) هو ( إصابة ) كبري شمبات وجسر جبل أولياء باختصار ( شفتو كيف ) الفرق بين( الكلام الساكت ) و( البيان الرسمي ) وما بين ( الغلط ) و( الصاح )

*** الرموز في مختلف المجالات ( تحترم ) حية وميتة وعند وفاتها في دول تحترمها ( تنكس الأعلام )

ورحم الله رموز بلادي في السياسة والقيادة والإمامة والإبداع وهم بغادرون إلى دار الخلود دون وقفة على تاريخهم ودون ( ذكر محاسنهم ) في كلمة وداع

*** الزول ده في يناير وفبراير هو نفس الزول في مايو ويونيو

الزول ده في اغسطس وسبتمبر هو نفس الزول في أكتوبر ونوفمبر

الزول ده في راس السنة هو نفس الزول في أولا وآخرا

الزول ده في كل زمان وبلا جديد يا هو الزول ده

*** تصورت المنظر وضحكت ملأ فمي وصديقي العزيز مبارك البلال يكتب:

ضبان بورتسودان أخطر من دانات الخرطوم

*** يفرض نفسه رئيساً للمريخ بين الحين والآخر ويباشر الرئاسة ومهامها ( بمزاج عال ) وعلى ما يبدو فالسيد سوداكال لا مزاج له ( اليومين ديل ) وأبشر يا أبوجيبين وانعم وحدك بالرئاسة

*** في ظل الحرب

في ظل توقف النشاط الرياضي وتحول الملاعب إلى معسكرات

في ظل هذه الأوضاع أظنك وأنا اؤمن على نجوميتك وموهبتك أن مبلغ ال300 ألف دولار التي طالبت بها لتجديد عقدك مع الهلال كتيرة

مش كده يا غربال؟؟؟

عبدالمنعم شجرابي ..