مقالات الرأي

زاوية خضراء.  داؤد ابوكلام داؤد. .يكتب  الحركة الشعبية جناح الحلو.

 

 

الحركة الشعبة لتحرير السودان منذ قادتها الاوائل من لدن جوزيف لاقو بن الاستوائية مفجر التمرد بحركات الانانيا الاولي والانانيا الثانية واتفاقيته فيما بعد مع الرئيس الراحل/جعفر نميري باديس ابابا في سبعينيات القرن الماضي ثم تقسيم جنوب السودان الي ثلاثة اقاليم بحر الغزال والاستوائية واعالي النيل وفشلت الاتفاقية فيما بعد وتمرد مرة اخري كل من كاربينو كوانين بول ووليم نون وسلفاكير ودكتور جون قرنق ويوسف كوة مكي وتلفون كوكو وعوض الكريم كوكو وعبدالعزيز الحلو واخرين من جبال النوبا والنيل الأزرق مالك عقار إير ومن معه. وكان ذلك في ثمانينيات القرن الماضي استمر نضالهم ضد الظلم والتهميش من بعض احزاب السودان الطائفية ربيبة الاستعمار الانجليزي ورغم ان الحركة الشعبية تدعي القومية ولكن معظم المقاتلين من أبناء النوبا خاصة في جنوب كردفان وبهم تم تحرير جنوب السودان وفصله فيما بعد ومعظم الناس في السودان يعتقدون بان حركة الحلو تخص جبال النوبا بما فيهم الحوازمة والعطاوة والبقارة. صحيح الناس في جبال النوبا كانوا يكنون كل الاحترام والتقدير لنضالات الحركة الشعبية وبما قامت به من أجل جبال النوبا وهو تنظيم وحزب سياسي له جناح عسكري. وله أهداف وجماهير مثله ومثل أي حزب في السودان والانضمام له حسب إيمان الناس بمشروعهم والمنفستوا المطروح يعني ليس كسر رقبة للنوبا ان ينضموا للحركة الشعبية لتحرير السودان ولكن للأسف الشديد الله يقدرك تتكلم في الحلو تقول الزول ده جزوره مسلاتي او تنقد الحركة الشعبة. لا …لا انت كده اكبر(معرص). وتبع الكيزان والمؤتمر الوطني وعبد من عبيد الجلابة. وكمان (كلب بن كلب يجب قتلك فوراً). انت بس زيك وذي طير السمبر او جداد الوادي او حمار الوحش.!!؟؟ ومافي زول قال لهم انتو ذاتكم أعداء النوبا والعرب الحوازمة في جنوب كردفان وعملاء الجنوب وعملاء الحزب الشيوعي وعملاء مليشيا الدعم السريع والحلو عنده معهم اتفاق سري لا يعرفة جهلاء النوبا. المهم علي الصعيد الشخصي علاقتي أكثر من ممتازة مع كثير من قيادات وشباب الحركة الشعبية وبيننا الاحترام المتبادل وعملت معهم في كادقلي بجنوب كردفان في زمن الشراكة بعد اتفاق السلام الشامل (٢٠٠٥ حتي ٢٠١١.) والتقيت بهم في كاودة والبرام وأم دورين. وعاصرت فترة القادة/ خميس جلاب ودانيال كودي وعبدالعزيز الحلو عندما كان نائبا لأحمد هارون بعد عودته من أمريكا. وزرت إذاعة كاودة وعملت ورش لتدريب الاعلامين من الحركة الشعبية بالتعاون مع بعض المنظمات عندما كنت رئيسا لاتحاد صحافيي جنوب كردفان في تلك الفترة. أما عبد العزيز الحلو لم أجلس معه مباشرة في حياتي ولكن عندما كان في حكومة الشراكة مع هارون عملت معهم في مجال الإعلام خاصة ورش المصالحات القبيلة قبل انفصال ولاية غرب كردفان وسافرت معهم في طائرة واحدة هو وأحمد هارون الي منطقة أبيي والميرم وكان الحلو في الطائرة مشغول بقراءة كتاب لا أتذكر عنوانة. وعندي عمي المرحوم الاستاذ/محمود وادي كان دفعتة بالدلنج الريفية وحدثتي عنه وقال كان زول طيب والطالب المثالي في الفصل مهذب وهادي (لكن شكلوا كان من فصيلة الدبيب ابو نوامة) وايضا الاستاذ/رحمة شبو ابوقرون من الجبال الستة قال دفعتوا ولابس نفس طاقية الحلو قال دي هدية عزيزة من الحلو لشخصة الكريم ومعجب بها إعجاب شديد (ان خايف الصقور القاعدة تأكل رمم الناس في هبيلا تخطفها من راسه). ويا سعادة الحلو عمتي/حليمة دجال متزوجها قريبك من مساليت الجنينة وهو عمنا المرحوم/عبد الله جمعة أرباب. ودجال وجدي المك/ داؤد بخيت ناصر مارقين من بطن واحدة ومعهم جدي محمود بخيت ناصر. وعمتي حليمة وقريبك ارباب كلهم توفي بجدة بالسعودية والآن بنتهم الوحيدة موجوده هناك بالمملكة السعودية. يعني اختي بت عمتي ابوها مسلاتي. عشان مافي زول من جهلاء الحركة الشعبية يجي يقول نحن نكره المساليت ولكننا نكره تسلط ودكتاتورية المساليت ممثلة في الحلو ضد بعض قيادات النوبا بالحركة الشعبية. وبالمناسبة انا زرت معظم مناطق المساليت من الجنينة حتي وادي كجا ورايتهم كيف يصدتادون هم وقبائل التاما جداد الوادي بالسفاريك؟؟ ولكن ناس الحركة الشعبية كأنهم عندهم توكيل شرعي للتحدث عن الجبال النوبا واي زول غيرهم يقفل خشموا ويسكت.!!؟؟. ولا يحبون نقد (رسول الحرب عبدالعزيز الحلو). وماعندهم ديمقراطية (يا تشرب يانكسر قرنقك ) وتطيع الحلو طاعة عمياء كأنه ملاك نازل من السماء !؟ نحن معشر الصحفيين اقلامنا ندافع بها من أجل الوطن وما عندنا زول كبير غير قابل للنقد. ؟؟؟ عندما كتبت قبل أيام عن (هبيلا والمأزق الأمني ) شايف في ناس ما عجبهم كلامي. حتي بعض اصدقائي من الحوازمة والعطاوة والبقارة قالوا لي عصرته علينا شديد؟؟!!. قلت لهم (بعصركم وبخجكم خج البخسة لمن تجيبوا السمن والفرصة ) يا متمرين يا مليشيا الدعم السريع قاعدين معانا في جبال النوبا (وتشركوا مع حميدتي وتحاحوا في جنوب كردفان الله يهديكم قال قريش قال ). واقول وأنا من هبيلا وممثل امارتها ونظارتها في الإدارة الاهلية ومك من مكوك الجبال الشامخة لن نسكت لهذه الفوضي من بعض قيادات الحركة الشعبية وعلي رأسهم عبد العزيز الحلو(امس القريب الخميس ٧مارس ٢٠٢٤ الحركة قصفت كادقلي وجرحت الأطفال وعدد من المواطنين بعضهم حالتهم خطرة ). وكان هناك تخريج للقوات المسلحة باستاد كادقلي بحضور الوالي والجماهير الغفيره ومن قبل كانت السبب في تهجير وقتل مواطني هبيلا والتكمة وكان قائد التكمة القائد/عائد نجيب بدين قاعد بالشهور في التكمة (يأكل في اللحم ويشرب في اللين جيب تيس وجيب عجل وجيب جداد) وفي النهاية أين التكمة واين مواطنيها اليوم.؟؟؟ ويا عائد انا بعرف ابوك الأستاذ الفاضل/نجيب بدين واخوك صديقي الرجل الخلوق الاستاذ/عبدالعال نجيب. لا ادري أين هو الآن. ونحمل كل ما جري في هبيلا لابناء وقيادات الغلفان بالحركة الشعبية فشلوا في حماية اهلم في التنقل والزلطاية يا للأسف والعار!!!؟؟ ومعهم القائد/صنفور و يا سعادة القائد /كوكو ادريس شيل الصبر انا جايك براااك.؟؟؟ كثير من الناس في جبال النوبا والسودان يعتقد بأن هناك تنسيق بين الحلو ومليشيا الدعم وناس قحت وجماعة حمدوك وإلا فليخرج الحلو والناطق الرسمي بإسم الحركة الشعبية ويبرر لماذا تضرب وتقصف كادقلي وتغلق الطرق ويموت الاطفال جوعا ومرضاً في كادقي والدلنج وعموم جبال النوبا ولا عشان طائرات الامم المتحده دايره تنزل مطار كادقي بالاغاثة تقول لهم انا هنا ؟؟؟. نحن لا نشك مطلقا في ولاء بعض شباب الحركة الشعبية في الدفاع عن اهلم بجبال النوبا بالروح والدعم وكل غالي ونفيس ولكن هناك من يريد بيع جبال النوبا للمرة الثانية بعد انفصال الجنوب بثمن بخس دراهم معدوده. عموما نتمني ان نعمل معاً من أجل إستقرار جبال النوبا وجنوب كردفان ونقول لأهلنا الحوازمة والبقارة (المحرش ما بداوس ) وبكرة حميدتي واولاد الجنيد برجعوا دارفور ويخلوا (خشومكم ملح..ملح مع أهلكم النوبا). حيث لا ينفع الندم. 

 

المك/داؤد ابوكلام داؤد. مدير عيون التلال الاعلامي. الجمعة ٨ مارس ٢٠٢٤.

زر الذهاب إلى الأعلى