زاوية خضراء. بقلم :داؤد ابوكلام داؤد في السودان ما تشيل هم فطور رمضان

مساء أمس الأحد ٢٦ مارس ٢٠٢٣.الموافق الرابع من رمضان ١٤٤٤ هجرية تحركنا من الدلنج صوب الأبيض حوالي الساعة الرابعة والربع مساء وكان البعض من المرافقين يقولون سنفطر في الأبيض ولكني شخصيا ما كنت شايل هم الفطور إطلاقا لأنني على يقين بأن الشارع السوداني علي طول البلاد وعرضها عامر بالضروات والافطارات على قارعت كل الطرقات ومشينا و ممررنا بكبري السنجكاية هههههه ( سلام عليك ياالبشير في سجن كوبر تصوم وتفطر علي خير ) طبعا اليوم دااك لما ظهر البشير في محاكمته قال حكومة الصادق المهدي لم تنجز الا كبري السنجكاية. شايف في صيانة جارية فيه ووصلنا الدبيبات وقفنا عشرة دقائق وتحركنا صوب الحمادي خلاص الشمس مالت ومررنا بالشوشاية. وقلنا شكلنا ها نفطر في كازقيل… لكن فجأة لقينا الشارع مقفول أمامنا بالشباب والشيوخ والأطفال قالوا لينا ياناس تنزلوا خلاص زمن الفطور جاء وكان باقي ١٧ دقيقة بالضبط بعضنا قال نمشي قدام.. لكن انا شخصيا قلت لهم يا جماعة ما نكسر خاطر الناس ننزل ونفطر والله يقبل ونزلنا ولقينا الاباريق وجددنا وضوءنا وسالناهم حلتكم دي اسمها شنو قالوا اسمها (الضريساية الشنابلة) قلت لهم ناس احمد عقاب ببقوا ليكم شنو قالوا مؤسس البلد دي ذاتها جدنا الكبير عقاب يا سلاااااام وين احمد ورحمة عقاب ديل درسوا معنا الابتدائي في كرتالا ومن الزمن داااك لم نلتقي… اها تعرف ناس بريقع فضل الله واخوانهم. قالوا بحليل قريبنا قلت لهم صالح شقيقة متزوج شقىقتي. ام الحسن وقلت لهم تعرفوا جرو حسين في الكدرو. قالوا متزوج اختنا ونعرف ولده بشير جرو في كرتالا ضحك الرجل وقال انت نسيبنا قلت له عشان كده ربنا جابنا نفطر معاكم. وعرفنا كمان محمد كرار كان موظف في كادقلي بالشباب والرياضة والثقافة زمن ناس حسيب وقال كنت سائق ليوسف كوة مكي فترة.. قلت لهم وين العمدة وشيخ الحلة قالوا لي الراجل داااك اسمة عبد الباقي.؛ ضحكت وقلت لهم انا ذاتي إسمي التاني عبد الباقي مشيت وسلمت عليهو قابلني بكل بشاشة وكرم وفرح الصائمين قلت لهم انا المك /داؤد مك الكافير تاني كن جيت غادي الحلة الصغيرة اسمها النقرة تلقي جامع وراكوبة كبيرة ده البيت تزل طوالي ده ذاتو مرحال الشنابلة في طريقهم وترحالهم الصعيد…(الرحيل عز العرب) شربنا واكلنا وصلينا وقالوا حرم تشربوا الشاي والقهوة.. طيبنا خاطرهم وودعناهم وشكرناهم وكم كانت الفرحة والسرور بادي في محياهم وهناك الأطفال ينظرون علينا وكأن حالهم يقول لنا عليكم الله ياعمو ما تمشوا لكن قلنا لهم جزاكم الله خيرا يا ناس الضريساية وحلة الشنابلة. في ناس لما تقول لهم ديل الشنابلة ام بريش (هههه قالوا حبوبتهم جات ماشة وكانت شايلة البرش). يقول ليك أعوذ بالله ديل أكبر حراميه ههههه الله يسامحكم يناس والله ديل رجال ما بعدهم رجال رغم القيل والقال احبنناكم في الله ياشنابله وفي نيتي اشيل فيكم التار(المابشيل التار ابوه حمار) واتزوج منكم لأنكم توزجتم شقىقتي سلاااااام عليكم يا شنابلة.. ما عبر عابر بدياركم سلامة عليك يالعمدة عبدالباقي تقبل الله منا ومنكم الصيام والقيام وصالح الأعمال وعشت يا كردفان يا أرض الخير البرة وجوة وفي الشارع كمان.. عشت ياسودان يا وطن الكرم والجود.

المك /داؤد ابوكلام داؤد. الإثنين. الموافق الخامس من رمضان ١٤٤٤ هجرية. ٢٧ مارس ٢٠٢٣.