د . أحمد الطيب إبراهيم يكتب نرجع السودان و للا ما نرجع الآن
ده السؤال الداير اليومين دي وكل زول بيفتي براه …
أنا غايتو بقول رأي و الما عاجبوا يشرب البحر و العاجبو يعمل لي لايك🤜
— ده قرار شخصي و شخصي جدا لو انت في نزوحك ده وضعك المالي كويس و وضعك القانوني ممتاز و وضعك الاجتماعي مريح فاهمني اقعد وانتظر الخرطوم تتصلح والحرب تنتهي في كردفان ودارفور ؟
كدي خلونا نشرح الأوضاع دي لأنه نحن شعب الله العشوائي و دايما شغالين بي سياسة ( ناس امحومد سكاري نحن نسكر لمن نقيف لط )…
— وضعك المالي جيد بيعني انك شغال و عندك دخل في مكان انت نازح يكفي إيجارك و أكلك و مدارس عيالك و يامن ليك تقطع تذاكر سفرك لو قررت ترجع في أي لحظة .. لكن يا اخوي لو وضعك المالي كعب او في ذمة طرف تاني عليك الله اتفكفك وأنت أصلا ما يفترض تسأل عن اوضاع السودان 🇸🇩 سؤالك يفترض يكون واحد بس ( في اشتباكات بالأسلحة الثقيلة وللا مافي ) لكن تسعة طويلة في وللا مافي و للا كهرباء في وللا مافي و للا موية مافي دي رفاهية يفترض تكون تبع الناس العندها دخل ..
— عندك قروش و عندك دخل مالي ممتاز لكن وضعك القانوني صعب مثلا اقامتك مطوفة أو جاي بي زيارة و مهدد في أي لحظة ما يجدّدوها أتخارج من ضوء تعرف ليه ؟
لأنه لو صدر قرار بعدم التجديد ح تضطر تشتري تذكرة الطيران بي تلاتة أو أربعة أضعاف سعرها و لو انت دافعها مشكلة و لو دافعها ليك زولك المستضيفك دي مشكلات كتيرة لمن غلت لانك بتكون ذبحته حتي سافرت .
الآن هناك عشرة ألف أسرة سودانية في مسقط بعضهم كانوا في السجون ما لأنهم مجرمين ولكن لان اوضاع إقامتهم غير قانونية ودخلةا عمان بحسابات خاطئة و الآن تم إعفائهم بقرار من السلطان لمدة شهر و طلبوا منهم المغادرة وتوفيق اوضاعهم … وهم ما قادرين يغادروا معظمهم لأنه تذاكر الطيران مرتفعة شديد و مافي دخل و مافي زول ذاته في الحرب دي يقدر يدفع ليه تذاكر لي أسرة تامة . غايتو ربنا يفك أسرهم لكن كلما الزمن مر عليهم مشكلتهم سوف تتعقد اكثر و اتمني من حكومة السودان بدل تطلب من الدول الصديقة انه تدعمهم بالسلاح بس تطلب من الدول الصديقة مد يد 🤚 العون في ترحيل الناس ديل … بس قول ليهم أي دولة تتبرع لينا بي رحلة رحلتين و اكشحوهم لينا في بورتسودان و بعد كده البفتح خشموا منهم يقول كاني ماني اجلدوا طوالي ولو وضعه الصحي كويس نزلوا في أم صميمة والخوي طوالي .
في عطالة لافين في الميديا و شغالين الخرطوم ما آمنة والموية مافي و الكهرباء مافي و ديل اقسم بالله واحد فيهم بدفع مصاريف لي أهله مافي و لا واحد منهم مستضيف ليه أسرتين تلاتة في شقة ما كانت شايلاه هو عياله مافي واحتمال يكون منبطح ومشغل المكيف اربعة وعشرين ساعة و مفلفل شعره وما قاعد يدخل يده في جيبه ..
لعلمك يا اخوي لو داير تسعة طويلة تختفي من الخرطوم احسن تقدم لي جواز سفر غير سوداني في مكان انت نازح أو مغترب لانه سوف تظل تسعة طويلة لعدة سنوات في الخرطوم وفي كل السودان و كمان عندهم كلاشات ارجع يا زول و انت يا اخوي حياتك ما اهم من الناس الرجعوا قبلك ولا القاعدين وأنت أصلا ما عندك حاجة يشيلوها منك ناس تسعة طويلة ديل غير موبايلك الكله شمارات ده — لو لاقوك تسعة طويلة او جوك خليك عاقل و أديهم ليه و خليهم يطلعوا ليك الشريحة و قول ليهم شوووكرا لو وافقوا.
— كهرباء مافي لعلمك ولو في كهرباء كيبولات مافي و ولو بقيت عاقل و عندك باقي قروش اشتري ليك طاقة شمسية لزوم النور و مروحتين بس و التلاجة تكون عاقل لو عملت كده.
نصيحة اخري لو رجعت هناك ما دايرين فشخرة و حركات المغتربين الزمان ديك .. لازم أي زول يعرف انك جاي آباطك والنجم عشان ما يجي زول يضبحك بالليل و يكتشف انه ما عندك إلا قدومك ده المشغله فشخرة وابقي عشرة علي قدومك ( فالسمكة التي تبقي فمها مغلقا لن يصطادها احد ) .
— من المعبر أو المطار اقدم جلابية و اقدم بنطلون و قميص 👔 ادخل فيهم و يا ريت الأسبوعين الأخيرين ديل ما تحلق ذقنك ولا رأسك ولا تتمسح من اساسه ..
الأخوات النازحات المركبات ماكينة مغتربات الراجعات ولابسات الذهب الحقيقي و الفالصو ممكن ((يوديك لي الله طقيق )) عشان كده خطتك للرجعة توبك الطلعتي بيهو و قميص الهزاز و الشبشب أبو نخرة تلبسيهم وانتي راجعة و ابعدي من الحنة و الفشخرة بتاعة لما كنا في المملكة والله ح تندمي و تذكري ( كم في المقابر من قتيل لسانه ) ناس مصر ديل تسعة طويلة عارفنهم تعبانين و الرجوع بالتهريب تااااني براه بقوم باللازم .
لو سألتني شخصيا ارجع وللا ما ارجع بقول ليك ارجع الآن قبل بكرة لو ما عشان الكلام. الفوق ده بس عشان الأتي:
١/ رجوعك مبكرا ح تنقذ ما تبقي من البيت لأنه تأخيرك ح يزيد التلف مع دخول الخريف و ما تنسي أي بيت مافيه ناس ح يتعرض للنهب و ما تتخيل انه جيرانك سكنوا معناة انت بيتك ح يسلم دي أمنية قبل الحرب .
٢/ لو داير تصين بيتك الشهر ده ح يكون ارخص من الشهر الجاي لأنه المواد و العمال عليهم. طلب اقل وما تسمع كلام المنظراتية ….. ديل عطالة بدوك وهم ما بدوك حل و للا قروش
٣/ قاعد مع ولدك وللا مع اخوك و للا قريبك بي زيارة كفاية يا اخي قالوا ضيف كل يوم غلب السلطان .. يعني لو مستضيفك الملك ذاته ح يفتر و يقول الروب اتفكفك يا اخي يفك جبارتك وبطل تقالة دم .
٤/ سيارتك لو مشلحة قبل ما تصل امشي التشليح وارفع اسبيراتك و استعوض رب العالمين لأنه لو انتظرت ناس السجانة يفتحوا والله التجار ديل ح يرجعوا سعرانين و الله المسمار يبيعوا ليك بي تمن عجل الحديد و الماكينة يعرضوها ليك بثمن سيارتك كلها ويحلفوا ليك طلاق أنهم باعوها بالخسارة .
٥/ ارجعوا و صلحوا مدارسكم و مستشفياتكم و جامعاتكم واصلا مافي. حكومة قاعدة تبني من زمان السودان ده اتبني بالعون الذاتي
و دمتم سالمين
د أحمد الطيب إبراهيم
استشاري جراحة الكلي و المسالك