زاوية خضراء  بقلم :داؤد أبوكلام داؤد .. يا أمريكا يجب أن يقف هذا .؟؟؟

كغيري من الناس في السودان وأفريقيا وكل قارات الدنيا علي نطاق الكرة الأرضية استمعنا وتابعنا وقرأنا. كلمة وزير الخارجية الأمريكي السيد/ ماركو ربيو شكلوا حسه بالسيد (مسعد بولس ) مستشار ترامب ما قادر يعبر كويس قال أحسن نوريهوا كيف يكون التعبير تجاه مليشيا الدعم السريع المتمرده وجناحها المكسور من اتباع الحركة الشعبية جناح الحلو.؟؟ ربيو شات ضفاري لاحراز الهدف الدبلوماسي وكيف تكون لعبة الكراسي للوصول للهدف والكأس الماسي والفوز بالذهب السوداني والمعادن النفيسه الأخري والمواني البحرية ؟؟ من وسط الحروب والدماء الافريقية الرخيصة .قال لسعادة مسعدى بولس مليشيا الدعم السريع لا تنوي الإلتزام بالهدنة رغم إعلان الموافقه عليها بس خجل يقول ليهوا ولا أنت عميان من العمايل التي تمت في الفاشر من حصار وتجويع وقصف بالصواريخ والمدافع والمسيرات ومن أبادة وإغتصابات ونهب وفعل كل الموبقات طبعا الكلام ده تحت تحت وجوه جوه في قلب (ماركو ربيو) رغم أن قلب الخواجات مرات غليظ ومر ؟؟؟ و ماركو قال لابد من اتخاذ خطوات توقف تدفق الاسلحة والدعم الذي تتلقاه مليشيا الجنجويد القاتله الضاره السامه.؟؟ في شمارات واضافات مني؟؟ وقال المشكلة الحقيقيه والجوهريه التي تواجه أمريكا أن الدعم السريع يوافق علي أشياء ويكتبها ولا يلتزم بها ابداً.؟! ولايستطيع تنفيذها وبالتالي نحن أمام كارثة ( هسي لو قلت ليكم أمريكا ام الكوارث تقوم تزعلوا مننا ذي حركات المحبين المراهقين الصغار ) وانت براك عارف الدول التي تشتري وتمد الدعم السريع القاتل بالسلاح وكل العتاد الحربي واللوجستي وعارف الدول( القوادة المعفنه) التي عبر أراضيها يدخل السلاح السودان ويصل دارفور وتحت رعاية حكوماتها واجهزتها الامنية والسيد/ ربيو قال بدون لف ودوران أن الدعم السريع يعتقد بانه سيفوز في هذه الحرب وسينتصر.؟؟ بس ما داير يقول ليهم احلام زلوط وستفشلون بس مافي زول يسألني من (زلوط واخوه التاني داك قلوط أظنهم من قوم لوط ) ؟؟؟ وقال الدعم السريع يرتكب ممارسات عنف جنسي وفظاعات مروعة ضد النساء والأطفال ( أي مجمجه يا دعم يا صريع أمريكا عندها الفلم والعرض جاهز وشاشاتها كبيرة قدر أقليم دارفور ) تقدر تشوف اي حاجه حصلت وبكل شفافية خلو بالكم للكلام الجاي قال( لو كان تصنيف الدعم السريع كجهه إرهابية سيساعد في جعل وقف الحرب ممكن فليكن ) غايتو أمريكا دي بياعة جنس بيع ولا قاعد تخجل من أجل مصلحتها ( ممكن تحلق شنبها وحاجات كتيره وعبيطة كمان ) أمريكا دي تاجر كبير جملة وقطاعي تبيع وتشتري فوق وتحت التربيزة ومرات بالجمبات. ؟؟؟ وشكلها الأيام دي بضاعة السودان عجبتها وترامب بحب اللعب في الزمن الإضافي بعد الاصلي وغالباً اهدافه ترجيحيه . ؟! وقال هم عارفين الأطراف المتورطه عشان كده هم جزء من الرباعية يعني جوه الملعب ؟؟؟؟ يا احلي بت في حارة الخليج العربي نحن بنحبك لكن احتمال الزواج الميمون ضعيف والزواج قسمة ونصيب ( أمريكا تجارتها أكبر من تجارة الحمير ). وقال في منظمات انسانية أخبرتهم بأن آلاف من النازحيين واللاجئيين الذين كان يتوقع وصولهم وظهورهم لم يظهرو يعني اما قتلوا او غير قادرين علي الحركة لأنهم علي وشك الموت من سوء التغذية ( غايتو أمريكا دي ..بري ..بري . مادايرة تقول شايفه نفايات محروقه في الفاشر بعد دخول مليشيا الدعم السريع)

عموماً أمريكا تاجر العالم الكبير جملة وقطاعي. ؟؟ قالت يجب أن يتوقف هذا. ؟؟؟ وانت يا هذا يا كبير العملاء يا بن السودان الخائب الخائن وفلانه الأخري الخاينه والمغضوب عليها ؟؟ نقول للقوات المسلحة السودانية يجب أن تحمي الشعب السوداني في دار فور وكردفان هذه الأيام.؟؟ وهذا من واجبك ؟؟!! ويا أمريكا يجب عليكي إيقاف السلاح العابر من الدول هذه. ؟؟ ويجب أن تقولي لهذا.. وهذا ..لا تفعل هذا. ؟؟؟ أمريكا معروفة إذا لقت عوائق في الطريق طوالي تقفذ بالمظلات من فووق تلب كده. ؟؟؟ طبعا انا زول صحفي سوداني وافريقي لي علاقات مع أمريكا واشتغلت معها في المجالات الاعلامية والصحفية وكثيرا ما قدمت لي الدعوات بحضور مناسباتها الوطنية بسفارتها بالخرطوم بما فيها منزل السفير شخصياً قبل ٢٠١٩. وعندي هدايا منهم كثيرة اقلام وكبايات فاضية لم أعرف سرها حتي اليوم ههههه سامعك قاعد تقول جاسوس.. جاسوس.؟؟ وفي السفارة الأمريكية تعرفت علي وزير الخارجية في زمن الرئيس/ جعفر محمد نميري الراحل . منصور خالد وقلت له جدي يسن الحسب من الجبال الستة راجل حبوبه حمرة حدثني عنك عندما جئت تلميذاً في مدرسة ابي رؤف النموذجية بالهجرة بودنوباوي بأم درمان قال لي منصور ولد متعب ومشاغب وشقي ما زييك انت زول هادي..؟؟؟ وتعلمت من منصور خالد كيف يمكن أن تستفيد من كل الحضور في مثل هذه اللقاءات الدبلوماسيه السريعه العابره. ؟؟ عموما أنا خبير في الشئون الأمريكية السودانية يجب أن تسمعموا كلامي أمريكا تاجر كبير شغالة ما بين ( سويسرا والقاهرة والرياض واستانبول وواشنطن) وقريبا سوف يرقص العالم جمعياً علي نغمة السودان.؟؟ الكلام ده واضح يا مليشيا الدعم السريع انتهي بيع الحمير.؟؟!!

المك/داؤد أبوكلام داؤد

مدير مركز عيون التلال الاعلامي

الخميس الموافق ١٣ نوفمبر ٢٠٢٥.