سهل الطيب يكتب ربنا يعوضك  

شوفو ياجماعة

في فضائل مابتتلمة بالساهل .. يعني هسي التجاني حاج موسى دا الناس بتحبو لأنو بحب أمو وكتب فيها أمي الله يسلمك وبقت الغنية ايقونة يتبادلوها الناس من خشم لي خشم ومن أم لي أم ومن قلب لي قلب

إتنين في واحد .. شفتو كيف .. تحب أمك والناس يحبوك

.

حب الناس مابجي براهو .. أصلا في حاجات بتجي طقم

.يطردوك الدعامة من بيتك وبعدها وفي رحلة نزوحك تفقد أغلى وانبل وأجمل رفيقة عمر بعد رحلة من المعاناة ومساسقة بين المستشفيات وبعيد عن أرض الوطن .. آخر قطعة في الطقم دا إنو الشقة تتحرق وإنت ذاتك تمرق بأعجوبة

دي كلها دلائل إنو ربنا برضو بحبك وإذا أحب الله عبدا ابتلاه

.غايتو البعرفوا عن التجاني عندو طولة بال تحيرك وصبر على المكاره من غير حدود .. هسي لو ضربت ليهو بخصوص الحريق الحصل دا متأكد حايشبكني

🖐️ اها عاملين كيف الثورة وهل مشيت ناس فلان عزيتم وهل رجعت دكانك 🖐️ حايحاول يتبادل معاي أخبار اعيسر ويوصيني على الولد الكان شغال معاي والزول الكان بغسل ليهو العربية (أنا طبعا نسيت شكل الغسال دا) لكن التجاني فوق ذاكرتو في جيوب سرية خاتي فيها كمية من تفاصيل ناس منسيين وسط الزحمة لكن تجاني حافظم عن ظهر قلب .. بسألك من زول إنت العرفتو بيهو .. تكون إنت نسيتو لكن هو عاصر عليهو في ذاكرتو وممكن يكون بعصر ليهو في جيبو .. دا خلى بشر كتار طيبين ومساكين يدافروني في باب دكاني وكأني كرسي ولا طربيزة ويكونو عايزين التجاني بس لدرجة أنا سيد المحل مابشوفوني ولا بشتغلو بي

.غايتو الحريق دا بكون عندنا هنا لكن التجاني البعرفو انا لو لقى كرسي قعد فيهو وخشة معاك في عشرة ونسة ما أظن يتذكر الحريق الحصل في شقتو

.تجاني حاج موسى شدة ما مشغول وسارح في رحاب الله وعوالمو العجيبة ما أظن يتذكر موضوع كوارثو ولا بعرف يقول الحاصل عليهو .. هو ما الزول الممكن يقوليكم معاناتو لأنو حبو ليكم بمنعو يزيدكم غم فوق العليكم

.

ربنا يعوضك يا إنسان ياجميل وصحي المؤمن مصاب 

 سهل الطيب 💚💚