ممدوح حسن عبدالرحيم يكتب ( أشواق وأشواك )
بسم الله الرحمن الرحيم
جيت بي لهفة قلت ازيل من دربي الشوك
قلت أسقي الورد الطالع واتمعن وافكفك عروقوا إن كان مشبوك
قلت لقلبي تزف البشري وتمد الايدي للناس الكان سابوك
تنسي وتصفح وتجمع وتطرح أفعال من حرموك
تصفي النية ما تبقى قضية تزور من جافوك
قلت ألاقي البسمة وكليمتن سمحة ورود يهدوك
قلت رجالة زمالة وعشرة تفتح صفحة لمن ظلموك
قلت سنوات الجفوة كفاية ترد البعدو وكان سابوك
قلت بداية جديدة ليها أكيدة يعتذروا وكمان يرضوك
ولكن بي حرقة وجدت الجفوة وناس الكفوة ليهم سوق
وجدت الحفرة هي الحفرة وسوء العشرة وأذية وشوك
وجدت الغلبة وصوت الجلبة وفوضي الطلبة وناس حمدوك
رجعت صدمت دهشت أغالب دمعي اقيف منهوك
اسأل نفسي يا ربي ديل الناس الزمان حبوك
ديل الكانوا أهل الطيبة اهل البسمة وكتير ادوك
ديل ناس الحوبة وسورة التوبة وكتير باروك
ديل ناس الدروة وأهل الخلوة الكان بالدم يفدوك
اظنوا الزمن اتغير زمان كل الناس مثل امك وابوك
زمان الطيبة واليد ممدودة وجميع الكل يرعوك
زمان الحضن الدافئ والماء الصافي زلال يرووك
زمان الونسة الحلوة حنية وخوة ونجدة تكافل بي سرعة يجوك
يعودوا مريضك يفقدوا حبيبك بي طعامهم وزادن يرجوك
يا رب سامحني فهل قد اسمعت وكررت القول والعوك
متين تعود أيامنا السمحة وبي عزيمة وقوة نزيل عنا الشوك
متين يعود الورد يتفتح ونشمو عبيرو حلال مبروك
يعم يتمدد ما يحرم زول اظنوا بكفي وكمان بي يحوق
عافي وراضي وصافح وكلمات الود بلوكن لوك
صفحة جديدة الماضي نسيتو غرب وشروق
يا ناس الدنيا الزائلة أذكروا الآخرة اعدلوا سلوك
ممدوح حسن عبد الرحيم