زاوية خضراء. بقلم:داؤد ابوكلام داؤد يكتب  السودان والحي القيوم

إنها خواطر الصباح
خواطر ممزوجه بالإيمان خواطر الجمعة. خواطر جمعة طيبة. ويوم الجمعة من الايام المباركة فيها ما فيها حتي قيام الساعة يوم ينفخ الصور بصادف يوم الجمعة. قبل اسابيع وبالصدفة مررت وشاهدت علي الفضائية المصرية بالقاهرة. افتتاح مسجد ما أجمله من مسجد ، حضره كبار السادة بالدولة المصرية و علي رأسهم مفتي الديار وشيخ الأزهر . والقاهرة من أكثر عواصم الدنيا مساجداً ما اروع صوت الأذان في القاهرة. ؟؟!! ولفت نظري اسم المسجد (الحي القيوم ). واليوم صباحا بعد عودتي من صلاة الفجر وتلاوة القرآن. وأثناء اذكاري خطرت بخاطري هذة الزاوية الخضراء.(عشان مافي زول يقول لي شارب شنو ولا انت مجنون). سألت نفسي يا المك/داؤد ابوكلام داؤد..ده منو اول رئيس للسودان منذ البداية نمسك من آخر رئيس البرهان ونرجع لي وره ؟؟ (وره..وره مش كلام غني). وبرضوا تذكرت كلام ولدي (شرف) قبل سنوات وهو الوقت داك في الابتدائي وراقد جمبي. فاجأني بسؤال هذاني (تقول طيارة انتنوف). قال لي يا ابوي ده منو أكبر رئيس في الدنيا دي.!!!.؟ حقا فاجأني(كما فاجات حرب ١٥ ابريل ٢٠٢٣ اهل الخرطوم). وتعال شوف الجري عبر أفكاري وخواطري. الرئيس الامريكي ولا الرئيس الروسي ولا الرئيس الصيني ، ولا رؤساء أفريقيا والدول العربية.(لا شخبوط ولا ال نهيان ولا دولة الكيان اليهودية. ). وانا في حيرتي لم ينتظرني ابني (شرف) وكأني به يقول لي (يا أبي يا مخرف يا زهايمر). قال يا ابوي أكبر رئيس في الدنيا هو (الله). !!! هنا اغرورقت عيناي بالدموع. اعطاني جرعة زائده من الإيمان كادت تفجر صدري من شائعها ونورها وبهجتها وسرورها مما شرحته واثلجته وجاءت بخاطري اية الكرسي(الله لا إله إلا هو الحي القيوم…..) نعم رئيس الدنيا باجمعها وقيوم السموات والأرض هو الله تذكرت بأنه هو خالق العدس والفول والبصل والطعميه والعصيدة وملاح ام رقيقة. تذكرت بانني مخلوق من طين لازب. ؟! من نطفة في قرار مكين. ؟؟ تخرج من بين الصلب والترائب ؟ نعم لله(خزائن السموات والارض ).لا امم متحدة ولا مجلس الأمن . مجلس بتاع شنو ؟؟. قال (إيقاد وجيبوتي قال التراب في خشمك ) .ميزانية الله مفتوحه مش ذي حقت(جبريل ابراهيم نص مرتب وتلت مرتب ) (ما من دابة في الأرض إلا علي الله رزقها ).أما عن وزارة الدفاع (لا يعلم جنود ربك إلا هو.). قال ..قال.. ناس الدعم السريع والحركة الشعبية محاصرين الدلنج.(بالله قوم زح كده ولا كده). ياناس الدلنج قولوا .(يا حي يا قيوم.).(حسبنا الله ونعم الوكيل. ). إذا أراد شيئا يقول له كن فيكون (بيده الامن والسلام ). ما احلي القرآن واجملة. (ماتلك بيمنك ياموسي ) يسأل وهو.(الخبير العليم ).كضب ذي ما داير تكضب. ؟؟ (قال عصاي اتوكا عليها واهش بها علي غنمي ولي فيها مأرب أخري. ).مارب اخري علي الله يا موسي !!!(وهو الذي يعلم السر واخفي ).مش اليوم داااك قبل ما تجري تمشي مدين وكزت بها واحد من أهل فرعون فمات(عنصرية منك انحزت لقومك وأهلك ). خليك من ده كلوا نرجع الي السودان(ما داير أقول البلد الكحيان الكسلان). ربنا عارف منذ أن نزل ابونا ادم وامنا حواء من الجنة الي الارض ومعهم ابليس عدونا اللدود عليه اللعنه. ربنا عارف منو اول زول جاء السودان. ؟؟!!. وجاء من وين واكل وشرب شنو ومات وين وقبره وين . (انتو حميدتي وين.؟؟؟ ).وربنا عارف منو اول رئيس حكم السودان ده كلوا في كتاب. (لايضل ربي ولا ينسي ). القاعد يقول نحن النوبا الأصل في السودان؟؟!!. والقاعد يقول نحن العرب الاحرار.؟؟!!.والقاعد يقول ديل العبيد الفجار الانجاس المناكيد؟؟!!. والله العظيم ربنا لو طلع ليكم شاشه كبيره مليون بوصه. ووضعها كده من جبال النوبا وحتي حلفاء القديمة مرورا بالأبيض. والرؤية فيها من اربعة اتجاهات. وقال كده وشغل ليكم برامج السودان من( طق.. لطق ..طرق).يا فضيحتي. يا فضيحتنا. شاشه نظيفه ما فيها كده ولا كده.(قمر رباني نقي الصورة. لا نايل سات ولا عرب سات ولا إشارة ضعيفه ). حتي حمديتي كن حي ولاميت بظهر في الشاشه؟؟. ولو في كلام تم جاي ولاجاي مع البرهان ولا المؤتمر الوطني او حتي قحت وحمدوك بظهر في (الشاشه مليون بوصه).عموما نخليكم في شاشة السودان اتفرجوا كويس بلا كلام فارغ معاكم ونعود اليكم في الزواية الخضراء القادمة ونشوف رأيكم شنووو بعد التفرج ناس ما عارفه اصلها من فصلها. ؟؟!!

المك/داؤد ابوكلام داؤد. الجمعة ١٥ ديسمبر ٢٠٢٣