بابكر الاسيد ،، يكتب… ( شتلات المحنة الحبشية )

فجأة كده، قام الرئيس الحبشي ابي أحمد بزيارة للسودان.. وقد كان في استقباله بالأحضان رئيس مجلس السيادة الفريق أول عبدالفتاح البرهان بمطار بورتسودان..

ويأتي وصف الزيارة بالمفاجِئة، نظرًا للموقف المعلن والثابت المتماهي مع مليشيا الجنجويد، أعداء الشعب السوداني واحتضان جناحهم السياسي في أكثر من مناسبة، ومطالبته بحظر السلاح الثقيل والطيران للجيش السوداني. هذا الموقف الثابت للرئيس الحبشي، هو المعروف عنه منذ بداية الغزو الإماراتي للسودان وحتى اللحظة التي وطأت قدماه مطار بورتسودان وعناقه لرئيس مجلس السيادة..

بالطبع لا أحد يستطيع أن يتكهن بسبب ودوافع الزيارة المفاجئة.. وكل التحليلات تظل في باب التكهن والتخمين.. ولكن طبيعة الأحباش تجعل من انه مبعوث الكفيل الإماراتي هي الأرجح.. ولكن ماهي الرسالة، فهذا ما سيُعي المحللين، فهي داخل حقيبته وفي كابينة قيادة السيارة التي تولى قيادتها رئيس مجلس السيادة وعلى يمينه الرئيس الحبشي جوار عصاة الأوتماتيك التي تغيِّر السرعة حسب (الظروف)..

لذلك دعونا مع الظاهر من الزيارة، وهو غرس شتلات جاء بها معه من الحبشة.. فقد قابلها البعض بالسخرية وقابلها البعض بالاستغراب والبعض العميق أدرك مغزاها.. فممن قابلها بالسخرية منهم من قال إنه يريد أن يقول الحبشي جايب معاه شتلات للتأكيد على أن صدق مشاعره تجاه معاناة الشعب السوداني مجرد (شتلة)..

أو يكون البرهان سأله عن الرشاوي الأخدها من إبن زائد.. فقام غرس الشتلة دي وقال ليهو زي ما قال المدين في هذه الطرفة.. 👇🏾

تقول الطرفة: في واحد عايز من واحد فلوس، يعني بالسوداني، قروش.. يعني دائن ومدين بلغة القانون.. أها المدين زول بتاع جرجرة ومماطلة، شابك ليك الدائن الشهر الجاي.. خلاص إن شاء الله الأسبوع الجاي.. عندي قروش حتنزل لي.. وبقى ما بيرد على تلفوناته.. وغير شريحته.. وآخيرًا اختفى منه خالص.. أها مرة المدبن ده قاعد على الارض، فجأةً شاف الدائن من هناك جاي عليهو.. فى إبريق قاعد جمبو، شالو وعمل ليهو حفرة صغيرة كده وكب موية الإبريق فيها.. لما وصل الدائن وبدون سلام، قال ليهو : قروشي بس هسسه دي ناااو.. المدبن قال ليهو: يا زول هانت خلاص.. شفت الموية دي؟ هسه زرعت لي نواة بلح.. إن شاء الله لمن تقوم وتشيل، أحصد التمُر وأبيعه وأديك قروشك.. الدائن قعد يضحك.. المدين قال ليهو : تضحك! ما خلاص ضمنت قروشك، ليك حق..

أها يكون الحبشي قال للبرهان: هانت… لما شتلات المحنة دي يبقن شجر، بيرجع لابن زائد دريهماته..

تضحكوا… ضمنتوا قرَشكم.. ليكم حق..

بابكر الشيخ الاسيد

9 يوليو 2024م