زاوية خضراء بقلم: داؤد أبوكلام داؤد مبارك أردول والياً لجنوب كردفان.!؟
مرات مرات وأنا مابين اليقظه والأحلام ( في ناس طبعاً حا تقول أوهام ) هذه الخواطر ممكن تقول عليها إشارات خفيه وإلهامات لطيفه وخفيفه كما يقول أهل التصوف ( شايف عمك البرهان اليومين ديل لافي لف شديد لأهل التصوف شي في المناقل وشي ابوحراز وشي جاي وشي غادي ) يكون في علمك يا سعادة البرهان نحن عندنا علاقة ( بأبو عشة التور وبالنوبية أرو ترمان تعال زورنا مره يابلال عندنا ليك عسل .) المهم هذه الإشارات الخفيفه ترتاح لها نفسي. ؟ طبعاً أنت حر لو قلته دي خواطر مجنونه؟؟ وأصلوا المك ده بتاع خارم بارم شكلوا قاعد يشرب حاجه من الحاجات ديك المره خالص. ؟! ويا سعادة /حاكم أقليم دارفور وقائد المشتركة نقول ليك شكراً جزيلاً ( جوه خالص خالص مورال فوووق كرتالا الجبال الستة – هبيلا – الدلنج – كادقلي ) وعبرك التحيات لابو النسب سعادة اللواء/فيصل مختار الساير الفرقة ١٤ ولسعادة/ سكر شتت الفرقه العاشرة ولسعادة العميد /محمد رحمة عبدالجبار ( شيطان الجره شفشفه) ولسعادة العميد شرطة/ زين العابدين احمد زائد قائد المقاومة الشعبية بالجبال الستة هم السبب الأول للانتصار حتي كادقلي بعد الله. ؟؟؟ وتحياتي لكل الأهل بجبال النوبا كادقلي والدلنج لصبرهم الجميل حتي فك الله أسرهم من الخونه الجنجويد والحركة الشعبية جناح الحلو .
بصراحة منذ نهاية العام الماضي ٢٠٢٥ قلبي طامي من الكتابة لو لم تخني الذاكره آخر عمود كتبته بتارخ الاربعاء ٢٤ ديسمبر ٢٠٢٥ بعنوان الدفاع المشترك يا القائد عبدالفتاح وعملت مقارنه مابين عبدالفتاح بتاع السودان وبتاع مصر ؟؟ وعلاقتهم باليهود وغيرها من المقارنات. ؟؟ ومن قبله علي ما أذكر ١٥ ديسمبر عن دكتور تجاني عبدالقادر وسناء وحمد وقبله في ١٣ ديسمبر ٢٠٢٥ كتبته عن الإدارة الاهلية ما بين السياسة والوراثة والواقع المر. ؟؟ وفي هذا الإطار حاولت أشرح لسعادة الكباشي/ الدور المنتظر للإدارة الأهلية بمحافظة هبيلا والتي ينتمي لها كباشي شخصياً والتي تتكون من أثنين أمير و عشرون مكاً وأكثر من ثلاثمائة شيخ ؟ لكن يبدو أن هناك شخصاً ما أحدث للكباشي تشويشاً شديداً حول الإدارة الأهلية بجبال النوبا وعنده رأي واضح حول الإدارة الاهلية ( البوكوا حرام الموجوده في ولايات السودان بفتكر ديل خالين أطيان ) عموماً نعود الي الشاب الهمام الجزاب السياسي الشاطر الطموح..!؟ ( ود الحاجة خميسة لها الرحمة والمغفرة وللوالد عبدالرحمن الرحمةالواسعة ) الشاب/مبارك عبدالرحمن أحمد آدم. المعروف ب( مبارك أردل أو الضب عشان كده نحن جوه جحرك اليوم. جوه خالص يا مناوي هههههه ) . وأنا مابين خواطري الجميلة وليس المجنونه لقيت نفسي مدخل كرعيني الاثنين بجزمتي في مياة البحر الأحمر المالح وقدامي (١١ ) سفينة من حولها مراكب صغيره وأنوارها تتلألأ مثل النجوم في السماء تخيتلها جايه من مبارك أردل وماشه تحصل ناس جبال النوبا في هبيلا و الدلنج وكادقلي وتلودي وكالوقي والليري وأبوجبيهة حيث الأعداد الهائله من النازحيين واللاجئيين ( مش ذي الأربعين شاحنة بتاعت سلوي بنية ويا سلوي بنية خليك عندك حس أمني كلمتك ولا عزر لمن أنزر ) هنا أمام البحر الأحمر الواسع وأنا حلمان قلت لمبارك أردول شايفك تنطط جاي وجاي مثل ( القعونجه ) أنا شايف كن ترضي كن تأبى ومن مصلحة جنوب كردفان وعموما السودان أن تمشي والياً لجنوب كردفان في المرحله دي ( ههههه طبعا في ناس ها يكونوا مبسوطين أوووي يا سعادة الكباشي أوووي خالص خالص وتحت تحت في قلوبهم بقولوا ينصر دينك يا مك خلصتنا من مبارك أردل ده وتجي إنشاء الله قال ليك مسيرة في كادقلي و تودي في ستين داهية وتريحنا منو عامل لينا إزعاج شديد هههه) ما مشكلة قد أرتقي من قبلك شهداء الكرامة..عشمنا أن نلتقي في الجنة ( انت جمبك حوريه وتهدي لخالك المك حوريه بس يكون لونها ذي لون الكاكاو الأفريقي) ونرتاح من خالاتك زوجاتي الإثنين في الدنيا دي ( أميرة وسامية لكن شكلهم برضوا حا يباروني في الآخره هههه ) بعدين ما تقول أنا رشحتك ساكت والياً أنت زول مولود في جبال النوبا وسرحته بالغنم واكلته النبق واللعلوب ( وعمل ليك شخطك بختك ) ومشيت حفيان هسي باقي شوك الضريسه عامل ليك ( قرن في كرعينك تحت شايفك عامل فيها ولد من دهب هوووي تور اكي ) طبعا الاخيرها ترجمتها من النوبية( يا ولد اقعد في الواااطا ) خلي التنطط ذي القعونجه خليك حربويه أمشي خطوه خطوه أمشي براحه براحة تصل سريع) وبكره تاني نشوفك مدير للشركة السودانية للمعادن أو وزيراً للخارجية. ؟؟؟ أنت زول عندك علاقات قوية مع الامريكان والبريطانين والمصريين ودول الخليج وأفريقيا وجنوب السودان وعندك علاقات قويه مع حركات دارفور و وانت قائد التحالف الديمقراطي بالسودان..(وأنت عارف كويس جبال النوبا مخزن المعادن في السودان أرجع تعال جبال النوبا ياولد اسمع كلام خالك ) شيلوا الصبر معاي يا جماعه الليلة الزاوية الخضراء شكلها ها تكون طويله خالص وجوه خالص لأنها اول زاوية لي في العام الجديد. ٢٠٢٦ ؟؟ ولسع قلبي طامي من الكتابة ( البرهان ما شغال الشغله باتحاد الصحفيين ولكن شكلهم بهتموا بالمطبلين ) . ودي نصيحة مني اسمعوها يا سعادة/ البرهان والكباشي وعارفين السقط حجر البشير الزول الاسمه (طه أكبر عميل في السودان ) راجعوا الناس الحولكم كويس وتاني بقول ليكم راجعوا الذين من حولكم. ؟؟!!! عموماً ما داير أطول عليكم لكن وصيتي لمبارك أردل لمن تجي والياً لجنوب كردفان أول شي تجلس مع أهلك الحوازمة وتسمع لهم وتطمنهم وتقول لهم نحن أهل وأسرة واحده ولكن دخل الشيطان بيننا ؟؟!!وتناشد الخونه مليشيا الجنجويد القتلة اللصوص وأنت كنت ساكن جار المتمرد (حيمدتي دقلو الخائن) الحيطة بالحيطه في حي المطار ؟؟ قول لهم ختوا السلاح وشوفوا لكم شغله تانيه غير السرقه والحراميه وقتل الناس.؟؟ وتقول لأهلك النوبا تباع الحلو الخونه الآخرين ؟؟ من دخل كادقلي أو الدلنج أو وضع السلام في اي بقعة من جنوب كردفان فهو آمن. المهم في النهايه العجبوا كلامي ده يعجبوا والما عجبوا دااااك البحر الأحمر المالح يمشي يشرب منوا وكان داير يغطس خلي يغطس ويتبلي ذاتوو نحن شعارنا بل بس وجوه خالص خالص يا سعادة/ مني اركو مناوي وتقبل الله كل شهداء حرب الكرامة السودانية الظافره باذن الله .؟؟؟ وفي الختام أقول لأخي وحبيبي الرجل الخلوق المهذب المحترم والذي صبر صبر أيوب بكادقلي والذي لم التقي به في حياتي الا عبر الهاتف وتعاون معي كل التعاون في حصار أهلي بمحافظة هبيلا خاصة في توصيل الاغاثة في فصل الخريف عبر كوستي والمقينص وابوجبيهة حتي الجبال الستة له منا الشكر أجزلة وأياكي أن تزعل من خربشاتي الصحفيه وخلي بالك من (المرجفين حولك) أكيد فيهم الوساس الخناس ويقول ليك المك ده محرش وشغال ضدك خلي بالك ههههه لك حبي ومودتي وجزيل شكري
المك/ داؤد أبوكلام داؤد. مدير مركز عيون التلال الاعلامي الاثنين الموافق ٩ فبراير ٢٠٢٦