زاوية خضراء  بقلم:داؤد أبوكلام داؤد  يكتب مدينة الأبيض وحسم معركة شجر العشر.؟؟

في الأيام الماضيات كان جل أو معظم حديث القنوات العالمية والمنظمات الدوليه والأمميه وبعض قنوات العالم العربي والافريقي ( التبع الدلدول ) الرأسهم عامل ذي ( الكلول) هو نوع من انواع الفخار متعدد الاستعمالات وسريع الكسر. ؟؟ وبعض من ناس (غنمايتي راحت) الحاقدين علي كردفان وعلي مدينة الأبيض عروس مدائن كردفان الخضراء وشقيقة عروس الجبال ( الدلنج والذي تعلمت منها الجبال الثبات والجنجويد الشتات) و الحاقدين علي عموم السودان حتي من بعض أبناءه العاقيين تعرفونهم وأحد وأحد منهم أبوسفه وأبولفه وأبوكرشه (وأم شنووو ديييك ما تعرف ..؟؟؟ ) طبعاً مليشيا الجنجويد وأتباعهم من ناس الضلال المبين. قالوا خلاص الأبيض سوف تلحق بالفاشر وبقية مدن دار فور وغرب كردفان الفولة وبابنوسة والنهود والخوي وأبوزبد وغيرها..وأمطرت من سماء الأبيض صواريخ المسيرات واستهدفت مراكز الخدمات والمؤسسات وقتلت النساء والأطفال والشيوخ والنازحين في معسكراتهم الإنسانية دون وازع إنساني .؟! حتي شاحنات السكر والدقيق والوقود وشاحنات الضأن مابين الرهد والأبيض لم تسلم من حقدهم الدفين. ؟؟ لكن الجيش شنقل لهم مسيراتهم وفجرها في سماء الأبيض و تندلتي. ؟؟ وهذا الوضع الإشاعات بالتأكيد سبب أزمة في المياة والمواصلات وتعلمون أن هناك زيادة شديدة في عدد سكان المدينة بسبب النزوح من الولايات والمدن والقري المجاوره لها. حتي الناس عطشت ومشت كداري وخلت ركوب اللواري..وهنا فرح الحاقدين والشامتين علي حكومة الوالي/ عبدالخالق عبدالطيف وداعة الله. بأن خلاص ( الكجانة نجضت وهي مرحلة من مراحل المريسه الحامضة) وصارت أفكارهم سكرانه وحيرانه. مدينة اللبيض جاء إسمها من الحمار اللبيض وأنتم تعرفون الحمار لمن يحسد ويحرن بقيف ألف أحمر ( مرات الا تستعمل معه بدرة الشطة الحمراء تحت الضنب والزيل والأنف ) عشان كده منذ البداية في حرب الكرامة ٢٠٢٣ معركة مطار مدينة الأبيض وقفت ألف أحمر ضد مليشيات الجنجويد المتمرده الحاقده وعلي مشارفها يوم معركة جبل كردفان ( هلك الهالك قائدها عبدالمنعم شيريا ) وفي ذات اليوم فقدنا الرائد من الهجانة/ مؤتمن ادم عمران شقيق زوجتي وعدد من الجنود نسأل الله أن يفك اسرهم أن كانوا من الأحياء. ؟؟ وكردفان هلك بها هكس باشا وغيره من الانجليز والأتراك والمصريين والارنأووط والمأجورين من المماليك. وكان الحسم بالسلاح البسيط والتقليدي في ذاااك الوقت مثل الحراب والنشاب والسفروك وعصا القنا المضببه بالجلود والنبال وسوط العنج والسيف بما فيها سيوف العشر والطورية والحشاشه والفرار أوحتي بالحجارة وأحيانأً باستعمال البنية والكف والشلوت والصراع والضبح بالسكين إنها كردفان لا تستسلم بسهوله ومستعده تصل مرحلة اللحس باللسان والعض والكجم والجغم بالسنون .؟؟ كما قالت نساء كردفان لجبناء مليشيا الجنجويد خلو كلام المسيرات بس نحن راجنكم تحت تعالوا الأبيض خلو النقه الكتيره . ؟؟!! صحيح بعض الناس دخلهم الخوف حتي في بقية مدن السودان علي أهلهم في الأبيض. وكان هناك بعض الهم بخصوص العطش والمواصلات ولكن بفضل الله نزل المطر والناس والبهائم شربوا الموية الحلوة وبدأت تنبت الأعشاب وتخضر أوراق الأشجار وسرحت الاغنام والأبقار والأبل في سهول كردفان والمواصلات تحسنت والناس الكان كروشها كبيرة مشي الكداري نفع معاهم وصارو شباب ورشاقة ذي الورد بل أجمل وأحلى .. ( بس وصيتي خلي بالك من الرقيب وسلاح المفراكة يكسروك تبقي ذي المرحاكه هههه) طبعاً ناس الركاشات والتكاتك كانت أسعارهم وصلت حد الجنون اقل مشوار للركشة يقول ليك ( ٢٥ أو ٣٠ ) طمع ذي الطمع واحد من أولاد الركشة قال لي النسوان ديل كلامهم كتير يعني أنا اكب بنزين ب ٣٠٠ أشيلهم بكم يا خال هسي وريني..؟ ٣ ألف كتيره لحدي (ملجة الخضار و حي البترول)

عموماُ في ناس كتير من أهل السودان وخارجه الماعارفين طبيعة الأبيض وأهل كردفان صدقوا كلام مليشيا الجنجويد الأوباش السراريق القتله بقرب سقوط الأبيض وفي ذاكرتهم فظايع الفاشر وبابنوسة .نطمنكم ناس كردفان شغالين في شغلهم ومعركتهم الأساسية حسم شجر العشر الفخ الهش شي بالطورية وشي بالفأس وشي معط باليد لنظافة المساحات الزراعية وتيراب بالسلكاب والتركترات همهم حسم جوع السنين العجاف الفاتن. ؟؟ وبإذن الله سوف يعصرون هذا العام زيت الفول والسمسم وتحيات طيبات خالصات للقيادات العسكرية والامنية والمشتركة والمستنفرين وتحية خاصة جداً لقائد ركب اللجنة الامنية الوالي/ عبدالخالق عبدالطيف وداعة الله ومن بعدة لسعادة اللواء/ صديق الجيلي عبدالرحيم رشاش قائد الفرقة الخامسة هجانة هذا القائد المحبوب وسط جنوده الرجل أبو شنب المتواضع بن القيادي والبرلمان الصوفي صاحب مسيد القرآن سليل جبل طاسي وأم مرح منارة العلم في العباسية تقلي الشيخ/ الجيلي عبدالرحيم رشاش هذا الشبل من ذاااك الأسد وتحيات اخري خالصات لشعب كردفان السند والساعد الأيمن للقوات المسلحة السودانية في هذه المعركة معركة الكرامة لحسم شتات مليشيا الجنجويد انتو للجيش هشين مثل شجر العشر يكسركم بالبوت والشلوت حتي تمووووت يا ام كعوك لمن تكورك عووك.. .عووك… عووووك.. ؟؟؟

المك/ داؤد أبوكلام داؤد. مدير مركز عيون التلال الاعلامي السبت ٤/٧/٢٠٢٦