السفير دكتور معاوية التوم يكتب (صرخة وبل)
(صرخة وبل)
يا صناع الحرب كفاكم
ويا سفهاء الجنجا الطاغية
السودان من ارضه نفاكم
أرجعو يلا أدونا قفاكم
خلو المركب تصل الفيف
كلكم امشو الله لا عادكم
وخلو عنادكم واستبدادكم
وشغل البلطجة والتزييف …
شوفو البلد اتبشتن كيف
بنيران الحقد الفيكم
عدمتوه نفاخ النار
لا تعليم لا علاج لا صحة
لا حرية ولا استقرار
لا فيهو كسرة تعشي الضيف
يلا اتخارجو كلكم امشو
وخلو جياع الناس يتعشو
وخلو الطير يرجع لعشو
والمسكين الليهو تغشو
خلو الفرحة تقابل وشو
وتمسح دمعتو في يوم رجعتو
خلو ضلالكم واستهبالكم
ولو قايلين الغش ينفعكم
عمرو الغش ما بجيب الخير
وحبل الغش في الدنيا قصير
كان بتدوم دامت لغيركم
والسودان الصابوا دماركم
بكرا بيكشف عورة عاركم
عمرو الغش ما بيبني امير
و انتو دماركم في تدبيركم
ويبقى مصيركم
طلقه تشيلكم
و ضربة سيف…
وجغمة طيف.. وحرقة تخيف
و بكره نعيد للوطن امجادو..
وصبح اعيادو.. وسيرة اجدادو
ربيع و خريف..
و لامن تبقى
عضامكم ناخره..
يشيلها السيل…
و يوم الآخره..
تضوقو الويل..
وجند الليل …ورب الخيل
وياما تشوفو مصيركم كيف….
اصلو الدنيا سحابة صيف
…،،،،…..٠
السفير.د معاوية التوم
نيويورك ٢٩ اكتوبر ٢٠٢٤م