زاوية خضراء بقلم:داؤد أبوكلام داؤد  سعادة/ عبدة جماع (جامع المكارم كوم) ألف سلامتك

هذا العبدة جماع لاتملك الا أن تحبه فى الله وفي والوطن وفي جبال النوبا .؟! تجده دوماً متهلل الوجه كالهلال بشوش باسم ضاحك كأنه (حاتم الطائي) في جوده وكرمه .صاحب قلب أخضر نقي وله رصيد من العلاقات الواسعة علي إمتداد ربوع السودان بل حتي خارج السودان. ؟! سألت نفسي وسألت قلبي بالطبع .. قلت لهم ما سر العلاقة والمحبه والخوة والصداقة التي بيني وبين سعادة عبدة جماع منصور. ؟؟؟ سبق وان وعدتكم في آخر زاوية كتبتها عن الأخ والصديق إسماعيل دقليس نجار والذي بحمد الله بلغ تمام العافية حسب متابعتي له. قلت لكم عن جماع بأنه طريح الفراش يعاني من (الكلي) وقلت سأحدثكم عن جماع الشامل الكامل في قدراته الإدارية والسياسية والشرطية ؟ وهنا تدخلي قلبي وهزني من الداخل (كما هزت أحداث الفاشر وبارا البشعه ضمير الشعب السوداني وتفجر غضبه وعمته روح الثأر والانتقام لكل الشهداء الأبرار ) وقال لي يازول أنت لو ما عارف سر العلاقة بينك وبين عبدة جماع تعال (نوريك ونكلمك يا أبوكلام ) اول شي سر الأسرار تجمع بينكم ولاية الجزيرة تحديداً مدينة الحصاحيصا مدينة النهر والكنار والحب المولع نار ..أنت أول خطوة مشيتها في حياتك من قومتك من الواطا كانت بالحصاحيصا. وتحركتم أنت الطفل الصغير وامك سيدة وأبوك أبوكلام وعمرك تقريبا ثلاثة سنوات نحو حلفاء الجديده الي خالك / ادم عمران وخالتك / ام الحسن احمد عياد لحضور مولد زوجتك الهسي دي ام شمائل. انتي حبيت من زمن السماية وعمرك ثلاثة سنوات يا مستهبل .؟؟ بالله ياقلبي تفضحني قدر ده مالك هههه. قال لي احسن تسكت ومرتك التانية ذاتها قريبتك من الجزيرة في مدني دي (وفي سر تاني بينك وجماع ) تسكت ولا افكو علي الهواء ؟؟ خلاص.. خلاص .. يا قلبي الروب الحامض .!! ولا أوريك كمان تاني حبيت وين اول مره قلت له لا . لا..خلاص التوبه يا حبوبه.؟؟ وكمان صحبك جماع قلبوا فرفر معاك هنا في الحصاحيصا دي وتوج بالزواج من (ام تقوي) وقريبك مختار حسن نوبا من الكافير الجبال الستة متزوج اختها التانية يعني هم اصهار ونسايب سعادة اللواء/أبوبكر ابودقن فقيري متزوجين من اخواته ؟؟ كده وقع ليك يا المك داؤد أبوكلام وقع ..وقع.. يا قلبي شكراً لك الله يسترنا من فضايحك ؟؟ خلوا قاعدين تضحكوا فيني انتو فضايحكم (ابوجلاجل لو تكلمت القلوب). نعود الي سعادة عبدة جماع عرفته من بتنا واختنا الاستاذة/ مريم البتول أوشي وهي في اقاصي الدنيا بموعد عملية زراعة الكلي له وذلك يوم الاحد ٢٦ اكتوبر ٢٠٢٥ بالقاهرة مستشفي دار الفؤاد وهو الان في غرفة العزل وسبحان الله لقيتو هو ذاتوا راسلني في الواتساب وبلغني الخبر. وعرفته بأن دفعته من العسكريين ورجال الأعمال في تواصل مستمر معه علي رأسهم سعادة اللواء .الهادي الدحيش ورجل الأعمال خالد أوشي واحمد حمدون الخطوط الجوية السودانية ورجل الأعمال محمد احمد ابودقن والبقية لايمكن حصرهم هنا كلهم رفعوا أكفهم بالدعاء له بأن تكلل العملية بالنجاح. واستمرينا في القلق والخوف وهذا طبع كل محب لمن يحبه حتي راسلتني بنته سيدة الأعمال (تقوي جماع ). وقالت لي الحمد لله طلعوا بالسلامة والاثنين طيبين والدها وعمها المتبرع بالكلي. وقالت كانت العملية طويله و متأخره حتي الليل ..الف سلامتكم طيب الله كل ايام حياتكم ونشوفك يا سعادة جماع بكره في وطنك السودان وحسب متابعتي بأنك كنت في سلطنة عمان ومنها الي مكة المكرمة ومن هناك الي القاهرة لإجراء العملية والحمد لله الذي كللها بالنجاح.

سعادة/ عبدة جماع منصور محمد من مواليد مدينة الدلنج في العام ١٩٦٣ وتخرج من كلية الشرطة برتبة الملازم شرطة في العام ١٩٨٥ وتدرج في الرتب العسكرية حتي رتبة العميد. وتقاعد للمعاش ٢٠٠٥. وعمل خلال فترة خدمته في كل من القضارف والحواته والفاو وشرطة جنوب كردفان وسفارة السودان بمصر قسم الجوازات وفي دار فور كتم وعمل مدير عام للعلاقات البينية ومعتمدا لمحافظة الدلنج ومدير إدارة الحج بالخطوط الجوية السودانية وعضوا مجلس إدارة الحج صاحب عمل في التجارة والخدمات ووكالات السفر ممثل غرفة الخدمات بالاستخدام الخارجي وأمين عام منظمة إسناد جنوب كردفان شارك في دورات خارجية في مصر والسعودية وعضوا وفد التفاوض في أعمال العمرة والحج بالمملكة العربية السعودية ممثلا لوزير الداخلية وعدد من الجهات في هذا الشأن. وقد نال عدد من الشهادات التقديرية والثناءات من اتحاد أصحاب العمل وعدد من الجهات وساهم بعدد من الاسهامات بجنوب كردفان خاصة الدلنج في مجال الخدمات المختلفة يعرفها مواطني الدلنج هذه ملامح من سيرته العطره العامره في خدمة وطنه السودان واهله بجنوب كردفان عاجل وتمام الشفاء وسلامتك سعادة الهمام عبدة جماع منصور يا جامع المكارم كوم والما بتعرف اللوم ونقول لاسرتك الصغير وعموم المعارف والاهل وشقيقك الوفي منصور بأن عبدة جماع بن كل السودان وجزيل شكرنا لكل من سأل عن صحته ووقف معه في هذه المحنة التي مر بها نراك في تمام العافية كما عهدناك بشوشا مبتسما توزع الصدقات و الابتسامات لاحبابك في كل زمان و مكان.

اخوك المك/داؤد أبوكلام داؤد

مدير مركز عيون التلال الاعلامي الثلاثاء ٢٨ اكتوبر ٢٠٢٥