زاوية خضراء داؤد أبوكلام داؤد يكتب يا برهان حرر وطنك وأرفع علمك.؟!
في الصباح الباكر ودغيشاً بدري خالص جاني ولدي شرف في غرفتي وأنا راقد ماسك سبحتي ومتغطتي بالبطانيه .قال لي السيد المك صباح الخير قلت له حبابك السيد باشمنهدس شرف طبعاً ياداب ممتحن الشهادة السودانية ده في إطار رفع المعنويات .؟ قال يا أبوي أنت عمك البرهان ده مالوا حيران و محتار ومستعجل ؟؟!! ..طلعته رأسي من البطانيه وعينت ليهوا من تحت لفوق لقيتوا قاعد طرف خالص في السرير .؟؟ وبعين لي. لابس فنله نصفها أحمر ونصفها أزرق وفي الجزء الأحمر دائرة صفراء فيها ثلاثة أشرطه صفراء كأنها علامات (عسكري شاويش) ومكتوب في الفنلة (SPOTIFY ) وشعار مكتوب فيهوا ( F.O.P ) المهم تاني نظرت له و رجعته النظر كرتين.؟؟ !! وسألته قلت له البرهان مالوا .؟ قال لي قال داير يغير علم السودان 🇸🇩 وجادي وزعلان ومادي قدموا ؟؟ قلت له والقديم ده عامل كيف.؟؟ قال لي أصفر واخضر وأزرق وقال لي قالوا في دولة في أمريكا من الستينيات شالت العلم ده ؟! طبعاً رجعته بالذاكره وره خالص وحركات شرف البعملها معاي وهو صغير خاصة جنس الاسأله ذي دي. ؟؟ وقبل فتره برضوا جاني في غرفتي وقال لي هو لو بقي رئيس السودان سوف يحسم الفوضي دي ويأدبهم أدب ذي الأدب؟؟ وقبلها سألني قال لي ده منوا أكبر رئيس في الدنيا دي؟؟!! قلت له في ثلاثة رؤساء كبار بتاع أمريكا وروسيا والصين. قال لي. لا..لا..لا..سكته علي كده وأنا حيران كأنني سكران . ؟؟ اخرجني من حيرتي سريعاً. وقال لي هو ( الله ). هنا إترورقت عيناي بالدموع وسكته علي كده. ؟؟ قلت له الله يحفظك يا إبني ابوك طلع أكبر جهلول؟؟؟ فعلا الله هو الكبير المتعال وهو رب العرش العظيم. ؟ طبعاً امي سيدة وأبوي أبوكلام مره شرف زهجني قدامهم وداير اجلدو كلهم بصوت واحد قالوا لي ما تدق الولد ده ؟؟ ومن يومها شكلوا له حمايه وأنا ملتزم بهذه التوجيهات ياسعادة البرهان عشان كده ما تزعل من شرف ولدي لو قال ليك انت حيران ههههه.؟؟؟ مره من المرات وهو صغير مشينا البلد الكافير بالجبال الستة ونحن قاعدين تحت الراكوبه مع أعمامي مهندس/ ادم احمد كتلة وحماد موسي مختار جاء شرف ماشي سألوه فجاه يا شرف انت اسمك منو ؟؟؟ بدون تردد قال لهم انتو تقولوا يا شرف و تاني تقولوا أسمك منوا حتي اليوم مازالوا يضحكون.؟؟؟ وفي ذات الراكوبه لاحظ ادم فضل مقدوم والد المخرج الاذاعي يعقوب ادم فضل قال لي ولدك ده نرسله عشان يمشي يجيب الملاح.؟؟ هو بمشي بهناك وبرسل الشفع التانين!!! وكلمة البل. بل…دي ذاتها سمعتها من شرف بدري قبل الحرب دي. مره مشيت جبتوا من المدرسة بالعربية وهو في الأساس شاف العربات تخرم مننا وتمشي قدامنا الكلام ده ما عجبوا قال لي يا أبوي بل. بل يعني امشي سريع…ما اشتغلت به حتي نزلنا تحت في الشارع الترابي وبليت بل ذي البل… لمن اتكيف وصفق لي قلت له الرووب الحامض. ؟؟؟ عشان كده يا شرف شايف زولك البرهان شغال بل ذي البل..قال يا مليشيا الجنجويد يا تسلموا سلاحكم يا بل..بس. ؟؟
نعود الي قصة يا أبوي أنت البرهان ده محتار . ؟؟ طبعا انا سمعتة في الراديو نشرة الصباح اليوم مخاطبة سعادة البرهان رئيس مجلس السيادة للقوات المشتركة بقيادة سعادة( مني مناوي ) حاكم أقليم دارفور. وقال بهذة المناسبة يعلن مقترح إعادة علم السودان القديم الذي رفعه الآباء عند استقلال السودان سنة ١٩٥٦م ذو الألوان الأخضر لون زرعي والأصفر لون الصحراء والأزرق لون الأنهار. سألت شرف قلت له أنت رأيك شنووو لازم نجري حوار معه ونعرف وجه نظره. ؟؟ وشرحت له ماذا تعني هذه الألوان الأصفر ده برمز للصحراء النوبيه بدل الحوض النوبي والأخضر زراعتنا في مشاريع كرتالا وهبيلا والأزرق لون الأنهار قبل دخول العرب السودان ذاتوا من زمن سيدنا موسي وفرعون. ؟؟؟ وقلت له وبين وبينك انا ذاتي (علم السودان ده بشبه علم دول تانيه بس الفرق بسيط نفس الالوان ما عاجبني ) ؟؟!!! ولسع شايفوا صاري وشوو ومادي قدوموا ؟؟ قلت له طيب يا شرف أنا شايفك زعلان شديد من الموضوع ده من الصباح لمن داير تطرشك. ؟؟ وتقول للسيد رئيس مجلس السيادة البرهان حيران ومحتار ومستعجل .؟؟؟ الكلام ده عيب يا ولدي شرف ؟؟؟ طيب انت وجه نظرك للبرهان شنووو؟! قال لي يا أبوي خلي اول حاجه يمشي يحرر ( نيالا. ) وقول ليهوا (يا البرهان حرر وطنك وأرفع علمك. ) يا ولد.. يا ولد.. ايه الكلام ده خلاص هسي انا بقوم بكتب الكلام ده للبرهان لمن تمشي المدرسة وتجي تلقاني رسلت له الكلام ده . ؟؟ وفات خلاني رجعته لسبحتي وشغال. استغر الله العظيم…استغر الله العظيم…وتاني قمته قعدته.؟؟!! جاتني فكره ذي حقت البرهان دي قلت انا برضوا ما بوافق بتغير العلم الحالي الا بثلاثة بشروط لازم يغير شارع المطار وأفريقيا (بشارع الدلنج ) ويغير شارع المعونة الأمريكية ببحري بشارع ( بابنوسة الابنوسة ) ويغير اسم شارع العرضة بدايتاً من حوش الخلفية بأم درمان مروراً بسوق ليبيا وشارع الصادارات الي شارع (الفاشر شنب الأسد ). يا ولدي يا شرف تعال نسمي شهر ديسمبر ده شهر الفكره الحيرانه ههههه
أبوك المك/ داؤد أبوكلام داؤد . الثلاثاء الثاني من ديسمبر ٠٢٥ ٢